Hopp til innholdet

Psykisk helse og rus

Om tenesta

Psykisk helse- og rustenesta i Fyresdal kommune er eit kommunalt tilbod til barn, unge og vaksne som har utfordringar knytte til psykisk helse og/eller rus.

Målet med tenesta er å bidra til auka meistring, betre livskvalitet og støtte i utfordrande livssituasjonar. Tilbodet blir tilpassa den enkeltes behov.

Tenesta legg vekt på håp, meistring, brukarmedverknad og den enkeltes ressursar. Gjennom rettleiing og oppfylging tek tenesta utgangspunkt i den enkeltes mål og støttar arbeidet med å bygge vidare på eigne styrkar for å oppnå auka meistring, større sjølvstende og ein meiningsfull kvardag.

Tenesta er gratis.

Tilbodet er tilgjengeleg for innbyggarar i alle aldrar. Ein treng ikkje tilvising frå lege for å ta kontakt med tenesta.

For barn i barnehage- og grunnskulealder er helsestasjonen og skulehelsetenesta dei primære tenestene for oppfylging av psykisk helse. Ved behov samarbeider helsestasjonen og psykisk helse- og rustenesta for å sikre eit heilskapleg tilbod.

Ungdom kan få oppfylging av psykisk helse- og rustenesta når dette er formålstenleg, eller når oppfylging gjennom helsestasjonen eller skulehelsetenesta ikkje er ynskjeleg.

Psykisk helse- og rustenesta tilbyr både lågterskeloppfylging og langvarig, vedtaksbasert oppfylging.

Tenesta omfattar:

  • Kartlegging og vurdering av hjelpebehov
  • Støttesamtalar
  • Oppfylging ved psykiske helseutfordringar
  • Oppfylging ved rus- og avhengigheitsproblematikk
  • Støtte ved sorg, kriser og belastande livshendingar
  • Motiverande samtalar og endringsarbeid
  • Råd og rettleiing til pårørande
  • Bistand til å styrke meistring i kvardagen
  • Koordinering av tenester, ansvarsgrupper og individuell plan

Oppfylginga startar med ein kartleggingssamtale der behov og mål blir vurderte i samarbeid med den enkelte. Omfang og varigheit av oppfylginga varierer og blir vurdert ut frå individuelle behov.
Oppfylginga går som hovudregel føre seg på kontora til psykisk helse- og rustenesta.

Psykisk helse- og rustenesta samarbeider mellom anna med:

  • Fastlegane
  • Helsestasjonen og skulehelsetenesta
  • NAV
  • Heimetenesta
  • Rask Psykisk Helsehjelp Vest-Telemark
  • Spesialisthelsetenesta
  • Andre kommunale og interkommunale tenester

Ved behov blir det lagt til rette for tverrfagleg samarbeid for å sikre eit heilskapleg og koordinert tenestetilbod.

Psykisk helse- og rustenesta er ikkje ei akutt-teneste.

Ved behov for akutt hjelp skal fylgjande kontaktast:

  • Fastlege i opningstida til legekontoret: 35 06 73 00
  • Legevakt: 116 117
  • Nødnummer: 113

Psykisk helse- og rustenesta held til i same bygg som Fyresdal legekontor. Kontora ligg skjerma i enden av korridoren til venstre frå venterommet på legekontoret, og er skilta.

Kontakt kan opprettast på fleire måtar:

Etter ei førespurnad blir situasjon og behov vurderte gjennom ein kartleggingssamtale med psykisk helse- og rustenesta. Deretter blir eventuelle tiltak og vidare oppfylging planlagt i samarbeid med den enkelte.

Sist oppdatert

Fann du det du leita etter?